Til baka	Prenta
Umhverfis- og skipulagsnefnd Dalabyggðar - 160 Haldinn í stjórnsýsluhúsinu í Búðardal, 03.12.2025 og hófst hann kl. 16:00 Fundinn sátu: Guðlaug Kristinsdóttir formaður, Bjarnheiður Jóhannsdóttir ritari, Björn Henry Kristjánsson aðalmaður, Sigrún B Halldórsdóttir aðalmaður, Viðar Þór Ólafsson varaformaður, Hlynur Torfi Torfason Skipulagsfulltrúi, Grettir Örn Ásmundsson byggingarfulltrúi. Fundargerð ritaði: Bjarnheiður Jóhannsdóttir, ritari Dagskrá:  Almenn mál 1. 2101044 - Loftslagsstefna Dalabyggðar Samkvæmt 5. gr. c. í lögum nr. 70/2012 um loftslagsmál ber sveitarfélögum að setja sér loftslagsstefnu. Umhverfis- og loftslagsstefna Dalabyggðar gildir 2021-2031 en hana ber að endurskoða eftir þörfum en rýna árlega. Nefndin leggur til að texti neðst á bls. 2: "og dvalar- og hjúkrunarheimilið Silfurtún" verði felldur út, þar sem sveitarfélagið rekur Silfurtún ekki lengur. Loftslagsstefna Dalabyggðar - svar til OUS.pdf 2. 2510031 - Deiliskipulag Tungu á Skógarströnd Framlögð tillaga til afgreiðslu að deiliskipulagi sbr. 1.mgr. 41.gr. skipulagslaga fyrir frístundabyggðina Tungu í landi Dranga á Skógarströnd. Nefndin frestaði afgreiðslu málsins vegna ónógra gagna á síðasta fundi en nú hafa skilað sér inn frekari gögn. Lögð er fram til samþykktar til auglýsingar tillaga að deiliskipulagi sett fram í greinargerð og uppdrátti, dags. 1.8.2025. Tillagan gerir ráð fyrir einni sameignarlóð með fimm byggingarreitum fyrir frístundahús á hverjum reit auk eins gestahúss eða geymsluhúss. Umhverfis- og skipulagsnefnd samþykkir að tillagan verði auglýst þegar gerðar hafa verið eftirfarandi lagfæringar á gögnum: - Í texta á uppdrætti er talað um skýra skiptingu lóða en um er að ræða eina lóð. Leiðrétta þarf misræmið. - Í skýringardálki á uppdrætti vantar tákn fyrir lóðamörk. 3. 2511025 - Borgarbraut - óveruleg deiliskipulagsbreyting Óveruleg breyting á deiliskipulagi Tveimur raðhúsalóðum breytt í þrjár parhúsalóðir í takt við eftirspurn vegna byggingu leiguíbúða. Afmarkanir eldri lóða lagfærðar til samræmis við skráðar stærðir. Óveruleg breyting á deiliskipulagi Borgarbrautar til afgreiðslu skv. 2. mgr. 43. gr. skipulagslaga. Umhverfis- og skipulagsnefnd telur breytinguna geta fallið undir málsmeðferð um óverulega breytingu. Ekki er um að ræða fjölgun íbúða í götunni eða hærri hús en gildandi skipulag heimilar og því eru áhrif hennar óveruleg á nærumhverfið. Nefndin samþykkir breytingartillöguna að undangenginni grenndarkynningu eigenda húsa við Borgarbraut í samræmi við 44. gr. skipulagslaga. 4. 2412014 - Eiríksstaðir 2025 Rædd möguleg uppsetning þjónustuhúsnæðis á Eiríksstöðum m.t.t. skipulagsmála. Nefndin leggur til við sveitarstjórn að unnið verði deiliskipulag á grundvelli gamallar tillögu að skipulagi, sem ekki öðlaðist gildi á sínum tíma. 5. 2511018 - Umsókn um breytt staðfang Framlögð umsókn um breytingu á staðfangi. Nefndin setur sig ekki upp á móti breytingu á nafni fasteignarinnar. 6. 2512004 - Umsókn um byggingarleyfi fyrir fjósi að Emmubergi Framlögð umsókn um byggingarleyfi fyrir fjósi að Emmubergi. Nefndin samþykkir erindið og felur byggingarfulltrúa að vinna málið áfram. Mál til kynningar 7. 2511024 - Markvissari árangur í umhverfis- og loftslagsmálum Fyrr á þessu ári óskaði innviðaráðuneytið í samstarfi við umhverfis-, orku- og loftslagsráðuneytið og Samband íslenskra sveitarfélaga eftir upplýsingum um aðgerðir sveitarfélaganna í umhverfis- og loftslagsmálum. Beiðnin var sett fram á grundvelli aðgerðar 7 í stefnumótandi áætlun í málefnum sveitarfélaga fyrir árin 2024-2028 en markmið verkefnisins er að kortleggja aðgerðir sveitarfélaganna til að skapa grundvöll fyrir markvissari árangri á sviði umhverfis- og loftslagsmála. Alls bárust svör frá 37 sveitarfélögum. Meðfylgjandi er samantekt á framangreindri kortlagningu en með henni er þeim hluta verkefnisins eins og honum er lýst í áætluninni lokið. Næstu skref eru frekari gagnaöflun varðandi ákveðin umhverfistengd verkefni og að nýta niðurstöðurnar til að bæta upplýsingagjöf og stuðning til sveitarfélaga, s.s. í gegnum Verkfærakistu loftslagsvænni sveitarfélaga. Þegar hefur verið ráðist í ítarlegri gagnaöflun á grunni þeirra niðurstaðna sem settar eru fram í þessari skýrslu. Samband íslenskra sveitarfélaga framkvæmdi könnun á stöðu sveitarfélaga í loftslagsmálum og liggja niðurstöðurnar fyrir. Kannanir um stöðu sveitarfélaga í úrgangs- og loftslagsmálum verða jafnframt framkvæmdar reglulega á næstu árum til að sífella verði í gagnaöfluninni og hægt verði að sjá breytingar yfir ákveðin tímabil í samræmi við samstarfssamning sem er í gildi milli Sambands íslenskra sveitarfélaga og umhverfis-, orku- og loftslagsráðuneytisins. Mál til kynningar. Aðgerð 7 - kortlagning - samantekt..pdf Fleira ekki gert. Fundi slitið kl. 17:30
Til baka	Prenta